Шымкентте мас еркек әйелі мен үш айлық қызын сабаған

Шымкентте кеше түнде болған оқиға жайлы қоғам белсендісі Айгүл Орынбек әлеуметтік желідегі парақшасында жазды, деп хабарлайды Malim.kz.

Бүкіл ел көрсін қандай істерде жүретінімді. Түнгі сағат 4:00 те «Роща ауруханасы ана мен баланы қабылдамай жатыр», деп хабарласты. Құдайдан қорықпайтындар «Айгүл Орынбек келеді» деген соң ғана көмек бере бастаған. Бірақ өте кеш, бала басына қан кетіп, реанимацияға түскен!, деп жазды ол әлеуметтік желіде.

Оның жазуынша, үш айлық баланы теуіп, лақтырып, әйеліне пышақ жүгірткен 53 жастағы күйеуі әлі қамалмаған. Сонымен бірге, ауруханаға барғанда «адам көп, үйлеріңе қайтыңдар» деген дәрігерді жазалау керек екенін айтады.

Бұл жағдайға қатысты оқиға куәгері – көршісі Назира Мұңалиева да болған жайды айтып берді. Оның сөзінше, кеше түнде осы әйелдің көшеге қашып шыққанын көршілер көріп, 102 мен 103 нөміріне хабарласқан. Ал мас күйеуі полиция ұызметкерлерімен төбелесіп, артынан күшпен басып алып кеткен. Артынан аурухана жатқызбайтынын айтқан. Сосын көршілер резонанс көтеріп, Айгүл Орынбекке хабарласатынын айтқан соң ғана дәрігерлер Бас дәрігеріне хабарласып, содан кейін қарай бастаған.

Біз баланың памперсін ауыстырамыз дегенде баланың денесінің көгергенін көрдік. «Балалар педиаторын шақырыңыздар, бала да зардап шеккен» десек, дәрігерлер бейғам отыр. Сосын айғай-шу шығарып, 103-ке хабарласқанда ол кісілер «қабылдамаймыз» деп, әбден әуре-сарсаңға салды. Кейін біз «РОЩАНЫҢ» сыртындамыз дегенде ғана қабылдады. Сосын анасы мен баланы Асар ауруханасына алып кетті. Азанғы сағат 08:00-де хабарласқанымда баланың бас сүйегі сынып, миына қан кеткенін білдік. Бірақ анасына ешқандай медициналық көмек жоқ, дейді көршісі.

Фото: egemen.kz