Таиландтан «Қазпоштамен» алдырған. Алматы облысында есірткі контрабандасы ісіне сот үкімі шықты

Қаржылық мониторинг агенттігі Алматы облысында аса ірі мөлшерде есірткі контрабандасы  дерегі бойынша сотқа дейінгі тергеп-тексеруді аяқтады, деп хабарлайды Malim.kz.

Еске салсақ, Алматы облысы Іле ауданының «Қазпошта» АҚ бөлімшесіне жалпы салмағы 800 граммға жуық каннабис сығындысы (гашиш майы) есірткі заты бар пошта жөнелтілімі келіп түскен.

Жедел іс-шаралар барысында күдіктінің Telegram мессенджерін пайдаланып, Таиландтан есірткіге тапсырыс бергені белгілі болған.

Пошта жөнелтілімін ашу кезінде косметикалық заттар түрінде жасырылған 8 банканың ішінде есірткі заттары анықталған.

Сот үкімімен кінәлі тұлғаға 16 жылға бас бостандығынан айыру жазасы тағайындалып, тәркіленген есірткі жойылған.

Жалпы, жыл басынан бері ҚМА контрабанда және есірткі құралдарының заңсыз айналымы фактілеріне қатысты 135 қылмыстық іс тіркеген.

Сонымен қатар, 77,1 келі есірткі құралдары, 3,2 келі психотроптық заттар, 206 мың анаболиктер (улы зат) және 1 700 «Тропикамид» көз тамшылары тәркіленген.

Фото: видеодан скриншот