Бұған дейін Абай облысындағы Аягөз гарнизонында әскери бөлімнің офицері өзіне қол салғаны туралы жазған едік. Оның мәйіті кеше өзі тұрып жатқан пәтерден табылған.
Орталық коммуникациялар қызметінде өткен брифинг барысында қорғаныс министрінің орынбасары Шайх-Хасан Жазықбаев осы жағдайға қатысты тың деректермен бөлісті.
Оның айтуынша, қайтыс болған офицер - оның әріптесінің бауыры. Ол әскери қызметкердің суицид жасағанына сенбей отыр екен.
- Әскери қызметкер қаржы бөліміне екі жылға жұмысқа шақырылған. Ол 6 қыркүйекте келді. Тиісті ақшасы толық төленген. Қызметіне қатысты ешқандай шағым айтпаған, - дейді Жазықбаев.
Белгілі болғандай, офицердің мәйіті жұмыстан тыс уақытта табылған. Министрдің орынбасарының сөзінше, жас жігіт әскери өмірдің қиындығын әлі көріп үлгермеген.
- Оның келгеніне көп уақыт болған жоқ. Әскери өмірдің қиындығын әлі көріп те, сезініп те үлгермеді деп ойлаймын. Қылмыстық іс «Өзін-өзі өлтіруге дейін жеткізу» бабы бойынша қозғалды. Тергеу амалдары жүргізіліп жатыр, өзге ақпаратты жария ете алмаймын, - деді ол.
Фото: pexels
Байланысты жаналықтар
MalimBlocks
