Шымкент қаласында «Наурыз: жаңа арман, жаңа үміттер» атты іс-шара өтті. Бұл шара Көрісу күніне орай ұйымдастырылып, онда мерекенің мәні мен мағынасы жайлы сөз болды. Қазақстан халқы Ассамблеясы ғимаратында ұйымдастырылған мерекелік кешке қала әкімі Мұрат Әйтенов, зиялы қауым мен қоғамдық ұйым өкілдері, қала тұрғындар қастысты.
«Қыстан аман-есен шыққан ағайын бір-біріне қонаққа барып, хал-жағдай сұрасып, бір-бірімен көріскен екен. Бұл дәстүр Қазақстанның батыс аймақтарында жақсы сақталған. Биыл елімізде Наурыз мейрамын атап өтудің концепциясы әзірленіп, мерекені 14 наурыздан 24 наурызға дейін, 10 күн қатарынан атап өтеміз. Қазақстандағы ең жылы қала – шырайлы Шымкентіміз биылғы Наурызға ерекше дайындалуда. «Наурыз Шымкенттен басталады» ұранының аясында бұл мерекені жылда жоғары деңгейде өткізуді жоспарлап отырмыз, – деді қала мәдениетін республикалық деңгейге көтеру крек деп жиі айтып жүрген қала әкімі.
Әкімнің айтуынша, әкімдік алдында Наурызды Шымкентте халықаралық деңгейде жыл сайын атап өтілетін, оған әлемнен туристер ағылатын мерекеге айналдыру мақсаты тұр. Кеш барысында Наурыз туралы деректі фильм көрсетіліп, «Көрісу» атты театрландырылған көрініс қойылды. Мерекелік жиынның соңы концерттік бағдарламаға ұласты.
