2024 жылы Жер ресурстарын басқару жөніндегі комитет жүргізген тексерулердің қорытындысы бойынша 3,7 мың әкімшілік іс қозғалып, 500 млн теңге айыппұл салынған.
2024 жылы Жер ресурстарын басқару жөніндегі комитеттің аумақтық бөлімшелері «Азаматтарға арналған үкімет» мемлекеттік корпорациясының, жер құқықтық қатынастары субъектілерінің, жергілікті әкімдіктер мен филиалдарының үстінен 6,5 мыңға жуық тексеру жүргізді. Тексеру қорытындылары бойынша жер заңнамасын бұзудың 5,3 мыңға жуық фактісі белгілі болды. 3,7 мыңға жуық әкімшілік іс қозғалып, 500 млн теңгеге жуық сомаға айыппұл салынды, — делінген Премьер-министрдің жауабында.
Жауаптағы мәліметке сүйенсек, көбінесе мемлекет меншігіндегі жерге қол сұғу, ауылшаруашылық алқаптарды тиімсіз пайдалану немесе пайдаланбау, берілген телімнің қолданыс мақсатын бұзу, жерге иелік ету құқығын беруде заң бұзу, мемлекеттік жер кадастрын жүргізудің қателіктері, жерді жарамсыз күйге түсіру сияқты заң бұзу фактілері тіркелген.
Депутаттық сауалда Солтүстік Қазақстан, Алматы, Павлодар, Шығыс Қазақстан облыстарында жер заңнамасын өрескел бұзудың фактілері көрсетілген. Олжас Бектенов аталған заңсыздықтарға жауапты адамдардың бәрі әкімшілік жауапкершілікке тартылғанын айтады.
Фото: pixabay.com
