Түркістан тұрғыны арыстан асыраған
Оның ауласынан бір арыстан, екі бүркіт, сұңқар, екі үкі мен екі кекілік құсы табылды
Түркістан облысының тұрғыны өз үйінде арыстан мен әртүрлі жабайы жыртқыш құстарды асыраған.
Бұл заңсыз әрекетті облыстық полиция департаментінің ұйымдасқан қылмысқа қарсы күрес басқармасының қызметкерлері анықтады.
Полицейлер Сарыағаш ауданы тұрғындарының бірінің үйіне тексеру жүргізіп, ауласынан бір арыстан, екі бүркіт, сұңқар, екі үкі мен екі кекілік құсын тәркілеп алды. Ер адам жабайы аңдарды өз қажеттілігі үшін асырағанын айтты.
Тәркіленген жануарлар Шымкент қаласындағы зообаққа орналастырылды.
Қазір осы факт бойынша қылмыстық іс қозғалып, тергеу амалдары жүргізіліп жатыр.
Фото: agefotostock via Legion Media
