Ақмола облысындағы бұрынғы мешіт ғимаратында газ жарылды

Ақмола облысы Сабынды ауылындағы бұрынғы мешіт ғимаратында газ жарылып, үш адам қаза тапты, деп хабарлайды Malim.kz.

Ғимаратта еске алу асы өткізілген.

Облыстық ТЖД мәліметінше, газ бен ауа қоспасы жарылып, ғимарат қираған.

Салдарынан 1978 жылы туған ер адам қаза тапты. Құтқарушылар қирандылар астынан 1983 жылы туған әйел мен 2012 жылғы баланың денесін тапты. Жарақат алған 16 адам Астана қаласы ауруханасына жеткізілді, деп жазылған ТЖМ мәлімдемесінде.

Белгілі болғаны, ғимаратта барлығы 7 газ баллоны болса, құтқарушылар соның алтауын алып шыққан.

Қазір қирандыларды аршу жұмыстары жүріп жатыр. Оқиға орнында облыстық ТЖД-ның жеке құрамынан 30-ға жуық адам және 5 техника, сонымен қатар, жедел-құтқару жасағы, апат медицинасы орталығының психологтары мен Астана кинология қызметі жұмыс істеп жатыр, деп мәлімдеді ТЖМ.

Ал жарылыстың себебін Ақмола облысы мен Астананың ТЖД өрт сынақ зертханасы анықтайды.

Қазір облыстық ТЖД базасында жедел штаб құрылған, онда жедел телефон жұмыс желісі істеп тұр: 8-716-252-09-50.

Фото: ТЖМ