Теміртауда балабақшаға мас күйде келген тәрбиеші жұмыстан қуылды

Теміртауда балабақшаға мас күйде келген тәрбиеші жұмыстан қуылды. Сондай-ақ мекеменің басшысы да қызметінен босатылды.

Бұл туралы Телеграмдағы «Патриот» арнасы жазады.

Айта кетсек, Теміртаудағы «Айгөлек» мемлекеттік балабақшасының тәрбиешісі 30 қыркүйекте жұмысқа мас болып келіп, бүлдіршіндерге агрессия көрсеткен. Полицияға біреу анонимді түрде қоңырау шалып, болған жайтты хабарлаған. Бұл ата-аналардың бірі болуы мүмкін.

Полицейлер балабақшаға келіп, тәрбиешіні медициналық куәландырудан өткізуге алып кетеді. Оның нәтижесі бойынша, орташа деңгейде мас болғаны анықталып отыр.

Бұл туралы естіген ата-аналар балабақшаға келіп, бейнебақылау камераларындағы жазбаларды көрсетуді талап етіпті. Бейнежазбалардан тәрбиешінің тербеліп жүргенін, балаларды жұлқылап, оларға киімдерін лақтырғанын көрген.  

Теміртау қалалық білім бөлімінің басшысы Халипа Жаудинованың айтуынша, бұл оқиға бойынша қызметтік тексеру аяқталды.

- Сараптама нәтижесі тәрбиешінің орташа деңгейде мас болғанын көрсетті. Ол өзінің түсініктемесінде жексенбі күні бір шарада болғанын, сол жерде ішімдік ішкенін жазды. Ал дүйсенбіде жұмысқа келген, - деп хабарлады Халипа Жаудинова.

Балабақшаның асханасынан алкогольдік ішімдіктер табылмаған.

- Қызметтік тексерудің қорытындысы бойынша тәрбиеші педагогикалық этиканы өрескел бұзғаны үшін жұмыстаны шығарылды. Сондай-ақ балабақша директорының міндетін атқарушы да қызметінен босатылды, - дейді білім бөлімінің басшысы.

Фото: видеодан скрин